政壇：搞搞政：王敏剛兄弟係渡海泳健將
維港渡海泳中斷三十三年後，下月十六號就會復辦，業餘游泳總會希望今次復辦可以再現昔日國際盛事嘅光彩。尋日仲舉行試水活動，港區人大代表王敏剛都有報名參加，喺四十一分鐘內游完一千五百米，成績尚算唔錯。佢細佬、總會義務王敏超係當年嘅渡海泳冠軍，估唔到大佬都唔弱，王敏剛話，六十年代曾經參加過三次渡海泳，有次仲攞過第五名添！
事隔咁多年再游維港，王敏剛好謙話自己年紀大，今次比賽係純粹參與，挑戰吓自己。佢又話，自己平時有做開運動，對個人身體狀況好有信心，相信到時應該可以順利完成賽事。
回想三十年前參賽，王敏剛話當年有好多外國人專登搭飛機來港參與呢項一年一度嘅盛事，如今可以再喺香江暢泳確係一個好難得嘅機會，相信如果往後可以繼續舉辦嘅話，盛況應該不減當年喎。
