政壇：工聯會情侶區選後結婚
工聯會尋日舉行區議會選舉誓師大會，今年佢哋推出四十八個參選人，有「工聯小花」之稱嘅劉桂容（阿容）篤定喺元朗富恩選區對撼政壇老手、職工盟立法會議員李卓人，工聯會動員唔少支持者撐場，不過，阿容最開心見到嘅一定係佢男朋友喇。
阿容嘅男友葛兆源（源仔）係現任荃灣福來選區區議員，佢哋已經計劃一三年拉埋天窗，源仔嚟緊都好有機會報名爭取連任，如果佢哋兩個都順利勝出，政壇分分鐘多對區議員夫婦。源仔被問到婚事時笑笑口承認，但就唔願意透露太多。
尋日誓師參選嘅阿容再被問到同阿人對撼，佢就話自己無意挑戰政治明星，今次係李卓人撼佢，唔係佢撼李卓人喎。
葛兆源（左二）同劉桂容（中）喺區選後兩年就會拉埋天窗。