政壇：林鄭玩火隨時燒埋身

港府官員亂點火頭，好多時燒唔到人哋、自己就周身傷。早前有市民司法覆核港珠澳大橋嘅工程成功，煲呔曾慶到喺立法會開腔，話人阻住政府工程，結果引起好多界別憤斥。點知政府高官都學唔精，發展局局長林鄭月娥尋日出席一個研討會嘅時候，又批政府對中區政府總部西座（政府山）用地規劃遭到團體司法覆核，更加以「只顧自己利益」形容呢啲行為，林鄭雖然係好打得局長，但係煲呔曾衰咗冇耐，佢又再重蹈覆轍，當社會嘅反對聲音係死嘅，唔怕引火埋身咩？

測量師學會尋日搞咗個研討會，主題圍繞本港作為商業中心嘅發展，林鄭應邀出席主講。由於政府啱啱宣布第四季撥地，唔少傳媒都在場恭候佢大駕，林鄭講到政府點樣支持商業中心嘅發展，仲話本港對辦公室的需求好大，政府亦睇到呢啲勢頭，喺規劃上配合作準備，譬如政府計劃將原政府總部西翼同灣仔警署發展為辦公室用地，但就受到司法覆核挑戰。

攞香港整體利益鬧人

林鄭認為，本港有部分人只顧自己嘅利益，忽略咗香港嘅整體利益，佢強調自己唔係指摘乜嘢人，人心難免有陰暗面，都會保護自己利益，但香港要向前發展，就應以整體利益為重。林鄭呢番話雖然唔算明刀明槍，但手法就同煲呔曾當日幾乎同出一轍，攞香港整體利益鬧人哋司法覆核阻住政府。

司法覆核係小市民嘅權力，無論有錢冇錢，最少感到冤屈嘅人有個途徑發聲，有個機制重新審視有冇人霸權、林鄭作為政府高官，採取嘅態度係咪應該包容，而唔係咁樣「點火」呢？