執法者濫權 剝光豬上癮

公權無限大，人權大平賣。海關又爆濫權醜聞，原來野蠻暴政唔係獨裁者專利，香港小市民嘅人權同私隱，亦隨時可能畀官府「剝光豬」。

呢，中秋節當日，一位女補習教師由深圳灣口岸返港，喺香港海關通道被截停，由女關員帶入房搜身，但並無解釋原因。女教師要求關員唔好伸手入胸圍內，但對方唔理三七二十一，又揭裙，又用力扯開胸圍檢查，期間仲頻頻觸及事主敏感部位添。卒之搜咗足足十五分鐘，乜都搵唔到至放人。正如女事主話齋，呢段恐怖經歷簡直係奇恥大辱。

叮！海關執法無可厚非，女事主有問必答，主動配合，亦係應有之義，但關員手法粗暴，唔理人哋感受，更唔尊重私隱，未有任何證據就當係罪犯咁處置，完全漠視市民人權，簡直離晒大譜。有大律師話，關員搜身前無清楚講明原因，搜身時更觸碰到女事主敏感部位，唔止程序不妥，更有非禮之嫌，試問海關如何解釋！

唉，海關執法粗暴唔係第一次嘅啦。淨係上個月就有兩單，一位女士同一名少女先後喺深圳灣同落馬洲口岸被關員「剝光豬」搜身，甚至連底褲都被扯低。有位海關男主管居然對其中一位不甘受辱嘅女事主話：「全世界嘅海關都可以裸體搜身！」

冇錯，海關有權對有嫌疑人士搜身，但亦絕對需要尊重對方嘅人權同私隱，唔係公權力大晒o架。最低限度，檢查程序都可以做得人性化啲，令事主感受好啲啩。

嗱，如果海關班官老爺唔識乜嘢叫人性化，不如學吓澳門。澳門警方喺國際機場新設立嘅X光人體掃描儀今日起正式運作，早前試運作期間，已經偵破咗兩宗人體運毒案。

睇吓喇，同樣係執法，香港海關完全唔尊重市民，搞到怨聲載道；而澳門就用儀器代勞，既可以達到執法嘅目的，又唔會令市民受辱，兩者簡直不可相提並論。

不過咁，粗暴執法可能係香港政府嘅傳統啩，近年警方經常爆出濫權剝光豬搜身醜聞，儆惡懲奸嘅執法者變咗肆無忌憚嘅施暴人，搞到民怨沸騰，警隊形象一落千丈，後來先至有少少收斂。

勢估唔到，海關好學唔學，居然將剝光豬搜身學到足。計太一叮話齋，本港執法部門愈來愈似內地公安，唔怪得「禿鷹一哥」被封為香港公安局局長喇，叮！