政壇：方文雄中總立會議席大熱

本地重量級商會喺立法會都有代表聲音，立法會選舉雖然明年先殺到，但有啲功能界別依家已經有暗湧，好似商界（二）即代表中華總商會嘅議席，據聞最近已經有結果，由協成行董事總經理方文雄跑出，擊敗早前公司爆出負面消息嘅「新金王」黃英豪，以及形象欠佳嘅「IQ博士」黃宜弘。

黃宜弘盤據中總立法會席位十多年，但表現同形象一直麻麻，經常開會飲醉酒同瞓覺，提出質詢同動議次數又少，成為立會大懶蟲榜嘅常客。不過，中總新領導層接手後，「百年老店」亦謀現代化同年輕化，亦傳出立法會代表接班人選包括常務會董黃英豪及副會長方文雄，點知黃英豪旗下公司早前爆出負面消息，佢本人更畀廉政公署請飲咖啡協助調查，搞到佢嘅行情由熱變冷。反而成為福布斯富豪嘅方文雄，就畀中總核心盛讚年輕有為，人緣又好，做人、做生意同做會務都冇得彈，且深得中總新會長蔡冠深支持，依家行情已經看漲。