政壇：搞搞政：容永祺撐唐爆宗教風波

疑似特首候選人口水戰日日上演，政務司司長「唐唐」唐英年陣營近日搏命造勢，最出位嘅要數專資會創會主席容永祺（Samuel），佢聲稱揀唐唐係受到上帝感召，呢番說話卻引起唔少反彈，仲搞到有基督團體質疑佢利用上帝，呼籲大家聽日去Samuel去開嘅教會踩場，一齊令佢受感召喎。呢一幕搵上帝出馬嘅橋段係咪好熟口面呢﹖

林建岳唐唐關係千絲萬縷

Samuel尋日重申，唔會收回言論，仲話歡迎大家去教會聽道理喎。有人惹嚟爭議，有人卻熱心加入，麗新發展主席林建岳出來挺唐，佢話唐唐喺政府做咗好多年，一直都支持商界，所以必定支持唐唐參選。林建岳同唐唐相當老友，兩人都好鍾意飲紅酒，如果大家記得，唐唐曾喺○七年中被指乘坐林建岳嘅私人飛機到法國酒莊，被質疑接受富商款待有利益衝突，雖然唐唐當時透過發言人澄清，但從表面看來，兩人關係千絲萬縷，唔知今次有冇景轟呢？

唐營猛放建制派出一人嘅聲音，唐媽媽唐尤淑圻尋日出席酒會時卻唱反調，話：「公平競爭囉，大家睇吓邊個有料咪邊個勝出囉！」好似完全唔擔心阿仔受到行政會議召集人梁振英（CY）威脅咁，至於唐唐係咪最好喺後日辭職，唐媽媽又輕描淡寫話：「佢揸主意啦！」梁營方面，一直被傳係CY支持者嘅立法會議員陳茂波尋日就幫腔，話港人鍾意「迎難而上」，仲話如果CY攞唔到足夠提名就好奇怪！