政壇：撐風化男惡搞任亮憲

區議會選舉殺埋身，政圈嘅攻擊波預料愈來愈多。有「維園阿哥」之稱嘅人民力量成員任亮憲近日遭遇首個挑戰，佢上次被指涉嫌強姦後，最終冇被起訴，近日卻被指「忽然高調」，網上亦流傳一張貼喺街邊嘅宣傳單張，話佢會成立一個「為受冤屈的男士發聲」嘅「驕陽」組織，呢個組織講到明為受到風化案委屈嘅男士服務兼發聲，單張製作認真，幾乎令人以為維園阿哥真係有此一着，點知人民力量漏夜發聲明否認，原來係一場惡搞。

「驕陽」組織傳單可亂真

呢份流傳網上嘅宣傳單張好似一般區議員嘅街頭宣傳品，除咗有任亮憲大大個樣外，仲印埋人民力量個黨徽，上面嘅字仲搞笑，話維園阿哥要搞個「驕陽」組織，目的係幫風化案受屈嘅男士發聲，單張上仲有令人一讀就會心微笑嘅金句，例如「女人幾滴眼淚，可令男人萬劫不復」、「拒絕沉默，從受屈的陰霾中走出來！」

呢啲金句可以話句句鏗鏘有力，似足任亮憲平時喺《城市論壇》嘅發言，字裏行間都明示暗示佢嗰單強姦、非禮指控。呢份單張隨即引起好多人關注，不過，人民力量卻發表聲明，話任亮憲冇搞過呢啲組織，更相信只係惡搞之作。

呢份單張網上瘋傳時，網民亦未知真偽，所以有網民就直斥任亮憲「仲有冇廉恥o架？」亦有網民話佢係「香港男權之父」。不過，有心水清網民話：「覺得佢係畀人玩。」人民力量尋晚發表聲明，話單張內容全屬作假，同人民力量或者任亮憲都無關係。好彩係假啫，否則任亮憲今鋪水洗都唔清，流走晒女性選民支持票。