水錶失準亂收費 水務官僚水鬥水

唔係水得咁交關呀?水錶係市民交水費嘅依據,但係申訴專員公署踢爆,估計全港有近十四萬個水錶唔準確,水務署抄錶一塌糊塗,一味靠估,呢鋪想唔認係「水皮服務署」都唔得!

申訴署發表調查報告,揭發水務署敷衍塞責,處事馬虎,烏龍百出,好似抄錶流程欠缺監察、抄錶員培訓不足、測試水錶方法欠妥,同埋懶理壞錶失準等等。總之一句講晒,水務署官僚嘅表現水皮到震!

嗱,其中一個投訴個案係咁嘅。灣仔一間大廈嘅公用地方水錶三年都錄得零水費,其後法團突然收到一張二萬五千蚊嘅巨額帳單,即刻嚇到傻咗。投訴後先至揭發水務署抄錶員○六年三月至○七年十一月期間,六次抄錶都錄得零紀錄,但竟然無任何跟進行動,直到○七年十二月先至發出換水錶指令,然後又拖到翌年九月先至更換水錶,再用八個月觀察用水量,先至靠估發出水費單。問題足足拖咗超過三年,於是咪出現呢單天價水費大混帳囉。

你話水務署做嘢係咪離晒大譜吖?大廈水錶長期零紀錄,稍為正常嘅人都知道水錶有問題啦,但水務署居然闊佬懶理,事件既反映抄錶員辦事粗疏、求求其其,亦凸顯水務署監察不足、得過且過。三年換一錶,市民絕對有理由反問水務署:錶你有冇?

水務署敷衍塞責,對水錶損壞視而不見,後果只有兩個。一係矇查查少收水費,令庫房損失,變相將納稅人嘅錢倒落鹹水海。一係就一味靠估亂收水費,擺明掠水。小市民有理由向水務署怒吼:「回水!回水!速速回水!」

嗱嗱嗱,要求水務署回水係有依據o架。申訴署估計,現時仍使用嘅水錶之中,約有百分之五、即係近十四萬個唔準確,要求水務署認真跟進。近十四萬個水錶嘅用戶被亂收水費喎,水務署係咪應該回水先?

唉,計太一叮話齋,水務署多收水費要回水,水務署官僚尸位素餐白拎人工就更加必須回水。唔係咩?水務署管理失職,更換不力,導致水管日爆夜爆,浪費大量珍貴食水,依家收水費又被踢爆亂咁嚟,成班水務署官僚根本係水兵鬥海軍,養佢哋係咪嘥米飯先?叮!

「Money18免費即秒股票報價網站」現推出8升級功能,財經資訊,實時實發!