政壇：亞洲富二代形象大平反
「富二代」畀人嘅感覺係含住銀匙出世嘅享祖蔭一族，巴克萊財富一項包括大中華區在內嘅富二代價值觀及態度調查卻發現，區內普遍嘅富二代都係工作勤奮一族，只有唔夠半數認為財富係用嚟享受。呢個調查係以亞洲區六個市場、擁有4,500萬美元財富嘅家族企業接班人做對象，即係話本港嘅豪門最少要有三億五千幾萬資產至可納入調查範圍。
調查仲話，大中華區嘅富二代都將屋企人嘅期望當做動力，用大量時間做準備，以便日後履行喺家族中嘅責任。近排忙於籌備2011博鰲青年論壇嘅菁英會創會主席施榮忻、榮譽主席白富鴻、常務副主席楊華勇同副主席霍啟剛都係符合調查資格嘅人，論壇尋日開鑼，加上獲平反，佢哋真係飲得杯落！
搞掂博鰲青年論壇呢個盛事，白富鴻(左)、施榮忻(中)同擔任論壇籌委會主席嘅陳寧濘（右）都鬆一口氣。