政壇：搞搞政：徐立之路過太古橋握手？
國務院副總理李克強月前出席港大百周年慶典時，警方嘅過分保安安排惹嚟各界不滿，港大校長徐立之事後表現備受質疑，佢一直推說事前參與唔多，不過尋日就有人爆料，話校方同警方就保安安排召開嘅最後一次會議，即警方要求大幅擴大校內保安區嘅會議，徐立之曾經現身，仲漏夜和一眾校方同警方高層巡視太古橋等核心保安區添！港大否認呢項傳聞，只係話校長「咁啱路過」太古橋，同警員握手打招呼啫。咁行貨嘅解釋你信唔信﹖
港大話，徐立之冇參與該次會議，當晚只係咁啱「路過」太古橋，為咁夜仲喺度做嘢嘅同事打氣，至於在場警員，佢只係握吓手打招呼喎！
點都好，港大呢次風波冇咁易平息，城大校長郭位尋日就笑言，依家新高中同大學都有通識教育，可以將呢個課題擺入通識課，唔知徐立之聽到有乜諗法呢？
