政壇：七高官輪住外訪嘥公帑

特區政府高官呢輪人人大玩離岸，唔係藉口考察就係訪問，以最近半個月計，最少有七個高官離岸，浪費納稅人金錢唔在講，外訪之後對香港有乜得益，真係要交代吓！

繼煲呔曾早前先去完比利時、再去舊宗主國流連忘返之後，勞工及福利局局長張建宗同運輸及房屋局局長鄭汝樺（Eva）又去咗美國三藩市出席亞太區經濟合作組織會議，搞到立法會今日討論新交通津貼計劃詳情，主責官員都唔喺度。

政府尋日再一口氣公布四名局長嘅外訪計劃，包括環境局局長邱騰華尋日出發去瑞典馬爾默，之後會再去丹麥哥本哈根同挪威朗厄松，理由係交流兩地嘅環保政策。同樣施政劣迹斑斑嘅食物及衞生局局長周一鑊，尋晚亦起程前往美國，首先會去三藩市同張建宗及Eva會合出席亞太經合會議，就如何預防同控制非傳染病發表演說，之後仲會轉飛紐約同亞特蘭大出席聯合國醫學會議。跟住又有政制及內地事務局局長林公公同商務及經濟發展局局長蘇錦樑去江西南昌，出席第七屆泛珠三角區域合作論壇。