政壇：棋哥捧白鴿當CY冇到

疑似特首候選人唐唐支持者連日出口術，欲勸退另一疑似特首候選人CY梁振英，CY尋日終於嚟個大反擊，除咗強調自己唔會被勸退外，仲話特首選舉有競爭先至有認受性。不過，挺唐嘅全國政協常委陳永棋（棋哥）隨即反駁，話特首選舉一定有競爭，只不過係唐營同白鴿黨之間嘅競爭喎！

CY尋日兩次見記者，高調反擊建制派只出一人嘅說法，仲話想參選特首嘅決心未動搖過，因為香港未來幾年要面對好多問題，如果冇一個有認受性嘅特首，日後施政會好唔方便，所以佢會迎難而上，就算有人勸退佢，佢都唔會退喎。

棋哥冇耐後就反擊，話同唐唐爭嗰個係白鴿黨主席鐵頭仁，提都冇提CY個名，擺明當佢冇到。兩大陣營雖大打口水戰，工業家蔣震卻話兩個都好好，邊個做都接受。行會成員梁智鴻亦贊成有競爭先至有進步，話兩個建制派入閘都冇有怕喎。有資深建制派人士分析，話如果中央唔干預特首戰，一千二百張選委票中，泛民應該攞到二百票左右，剩低嘅票源估計唐唐攞到六成半，CY就得三成半喎。