公務員有賞冇罰 服務獎大幅貶值

難得！難得！又出乎意料爆冷攞獎，睇嚟都要劏雞還神咯。

大家咪誤會，太一叮唔係講緊「桃姐」葉德嫻，呢位新鮮出爐嘅威尼斯影后係憑精湛演技奪獎，實至名歸，點會係爆冷呢？其實，太一叮講緊港府部門就真。大家知啦，政府嘅服務質素每下愈況，但係年年都有大批官僚部門獲頒「公務員優質服務獎」，你話係咪爆大冷？係咪匪夷所思吖？

睇睇今年又有邊啲部門得獎先啦。公務員事務局公布總共有六個部門獲獎，包括水務署同房屋署，以跨部門合作節約用水勝出，另外仲有警務處、入境處、消防處同天文台咁。

之所以話佢哋爆冷攞獎係有原因，警務處因警權風波備受抨擊；房屋署被死因庭點名批評，喺馬頭圍道塌樓慘劇中驗樓工作唔專業；水務署更加日日爆水管浪費大量珍貴食水，依家反而以節約用水獲獎，咁荒謬嘅事情，睇怕都只係香港至會發生囉。

本來呢，一竹篙不能打晒一船人，官僚部門雖然沆瀣一氣，但出於污泥而不染嘅公務員亦都唔少。港府對嗰啲真正緊守崗位、默默耕耘嘅優秀公僕頒獎嘉許，無可厚非o架，甚至乎仲係必須嘅添，事關咁至叫賞罰分明，做到選賢用能吖嘛！

嗱，按照呢個邏輯，公務員表現出眾嘅獲獎嘉許，咁表現差劣嘅係咪好應該懲罰先？不過好可惜，官官相衞已經成為港府管治嘅一大特色。唔好話官員尸位素餐，就算怠忽職守、行差踏錯，東窗事發之後一樣冇有怕，唔使燉冬菇，唔使減人工。唔怪得有人話港府係庸官劣吏嘅庇護工場囉。

最離譜嘅係，官員犯錯避過處分不特止，好多時仲會升官發財添。好似幾年前發生連串冧樹殺人事故，時任康文署署長嘅周達明受盡千夫所指。哈，點知港府唔單止冇懲處，反而轉過頭將佢擢升一級做發展局常秘，你話係咪激到吹鬚睩眼吖？

咁啦，港府有賞無罰，「公務員優質服務獎」嘅含金量已經大幅貶值，不如以後改為設立三個大獎，一個叫「公務員劣質服務獎」，一個叫「大懶蛇終身成就獎」，一個叫「全年犯錯十大金獎」，包保有大批部門同官員大熱獲獎，實至名歸。到時咯喎，港府就可以名正言順頒獎畀自己友啦，叮！