SUN世代：Keep住團火追逐電影夢
「我成日同人講，最緊要keep住把火。當你廿歲時雄心萬丈，話要創業，去到廿八歲左右，啲火就會開始熄晒o架喇。好多人都會有咁嘅問題，如果有心，把火一定要keep住！」華亞數碼（Vow Asia）製作公司創作總監波基，直至二十六、二十七歲，貼近「熄火死線」，才找到自己的真正興趣。他把握一次進修機會，成功將自己從IT業釋放出來，踏上追逐電影夢的銀色旅途。
波基是他中學時的花名，現已幾乎全面取代了他的真名，甚至卡片上也是印着波基兩字。波基憶述：「有次call台落call，啲人聽錯係波基，之後覺得呢個名幾得意喎，又易記，於是用咗，so far個個都係咁叫。」波基九七年於IVE畢業後，投身資訊科技行業，在使用IE 3、Netscape瀏覽器的年代，負責編寫網頁。做了七年左右，遇上科網股爆破，「自己冇學歷、冇人事，上唔到位，朝朝起身都唔想返工，好灰！心諗不如由頭嚟過啦，做自己鍾意嘅事」。
膽粗粗30歲轉行
他的興趣是電影。「我細個睇到文字會瞌眼瞓，但對影像就好敏感！」他公餘時間修讀香港導演會舉辦的興趣班，確認自己真的喜歡電影。「有次飲湯，見到鋪枱嘅報紙話浸會大學MFA招生，覺得係契機，於是膽粗粗試吓，點知真係收咗！」○三年畢業後，原想加入電影業，但「香港電影已係夕陽工業，我三十歲先入行，每個月得五千蚊，根本唔夠食」。
為了生計，他與兩名志同道合的朋友合組公司，闖入婚禮市場，「用drama方式，講述一對新人嘅浪漫歷程。」當時市場上並無同類服務，朋友聽罷反應都是「哈哈哈哈，真係o架？好運啦……」，「但我哋三個又覺得OK喎，從來冇質疑自己嘅product唔得，咁就繼續撐落去嘞。」
定期拍片等伯樂
創業四年，辦公室搬了三次，愈搬愈大，公司生意規模日漸擴大，去年九月更獲邀進駐內地的順德創意園，開拓龐大的中國市場。
生意愈做愈成功之際，驀然回首，距離當初的電影夢彷彿愈來愈遠：「我哋都曾迷失過，見到有生意就做。好在我哋成班人方向一致，最終目標係拍電影，有人提出警號，就開始修正方向。」為keep住把火，他們會每周舉行一次電影會及定期拍短片，短期目標是參加短片比賽，「等人賞識」，然後設法籌募資金，實踐電影夢。
波基小檔案
現職：華亞數碼（Vow Asia）製作公司董事及創作總監
學歷：浸會大學電影電視與數碼媒體藝術碩士
獎項：城市青年商會創意創業大賞（2009）
波基認清自己的興趣後，成功轉型。
波基經常與拍檔開會，互相激發創意。
當年爆炸頭打扮的波基，十分易認。（受訪者提供）
波基（右）期望有日可以籌拍電影，實踐理想。
波基（中）參加第一屆「鮮浪潮」比賽，找來同月同日生日的鄧健泓（右）做男主角，參賽作品名為《全家福》。
波基說自己「細細個就好鍾意幻想」。