政壇：朱繼陶娶新抱擺70圍
太子珠寶鐘錶執董兼鐘錶業總會主席Joseph朱繼陶上禮拜四榮升老爺，阿仔Ambrose朱國良同女友彭慧玲拉埋天窗，當日下晝一對新人先喺中環堅道天主教堂行禮，夜晚喺會展筵開七十圍宴請城中好友。飲咗新抱茶嘅Joseph同太太朱鄧麗萍成晚笑到見牙唔見眼，而阿女、歌手朱紫嬈仲上台獻唱祝賀新人白頭到老。
到賀嘅鐘錶界翹楚無數，工業總會副主席兼運年錶業老闆Stanley劉展灝都嚟見習吓，事關佢都就嚟飲新抱茶，佢大仔劉燊濤將喺十一月底做老襯，仲同喜運佳常務董事梁青華娶新抱之日撞到正添！Stanley仲話今次係佢第一次榮升老爺，緊張程度同當年娶老婆差唔多。
新娘彭慧玲（右三）喺太子珠寶打工遇上真命天子Ambrose（左三），姻緣天注定。朱繼陶同朱太（右一、右二）笑逐顏開，同親家合照。