政壇：搞搞政：民意低走 白鴿區選難飛

白鴿黨舊年轉軚令政改獲通過後心紅起上嚟，矢志要喺今年區議會選舉中，挑戰建制派星級區議員。點知一年過後，形勢逆轉，白鴿黨想飛都飛唔起，仲要縮沙添！

白鴿黨今年派出一百三十人參選，佢哋原意係透過由黨內大佬同立法會議員參選，谷起區選選情同投票率。不過，黨副主席「單雞」單仲偕尋日形容，呢次區選對佢哋嚟講係一場危機，因為近日民調反映白鴿黨民意唔高，同舊年通過政改後嘅高峰相比，差咗約莫一半，加上遭受疑似建仔B隊嘅人民力量狙擊，牽制住佢哋參選嘅星級人物，令佢哋唔可以過區幫兄弟手，故此壓力極大。

先有李耀基硬撼工聯會票后陳婉嫻，依家連立會議員黃成智再戰北區區會主席蘇西智，都因為要留守原區告吹。不過，單雞話佢哋已經有一支敢死隊準備上場，所以無論嫻姐、專業會議立法會議員梁美芬或建仔張國鈞，白鴿黨一定有人招呼佢哋喎。