政壇：滙豐保險兩猛人離任
滙豐香港區又裁員又換總裁，唔好以為地震帶只係零售銀行，原來另一邊嘅滙豐保險，亦同樣發生高層大地震，仲要一走就兩件，「舵主」湯德信（David Fried）提早退休，離任集團保險業務主管一職；香港區嘅阿頭梁偉邦（Robert Lang）上任唔夠一年，亦辭去香港保險業務董事總經理職務，返老家繼續打拚。
David今次提早退休真係提得好早喎，因為佢依家至五十歲，距離六十歲退休年齡差十年，加上佢貴為滙豐集團總經理，又常駐香港，今次提早退休自然令人聯想到會唔會同裁員有關。
雖然幾個月前就傳出Robert有意離開滙豐，只不過係未搵到人接任，惟有捱義氣頂住先。但呢個講法都令人有啲保留，試諗吓，Robert舊年年尾至加入滙豐，「幾個月前」就傳出計劃離任，咪差唔多一上任就想走？
湯德信（左）同梁偉邦（右）將辭去滙豐嘅職務。（資料圖片）