政壇：于正人收窩心自製月餅
瑞銀亞洲股票衍生產品銷售部董事總經理于正人今個中秋過得好特別，簡直可以用「大豐收」嚟形容。何解呢？話說每逢大時大節，佢都收到唔少客戶同合作夥伴送嚟嘅應節禮品，今個中秋節亦不在話下，最傳統嘅賀節禮物包括月餅或生果籃，但較為特別嘅係佢今年收咗兩份「大禮」—唔好誤會，佢只係收咗兩份心意特濃嘅小禮物。
一份係佢個客自家製嘅月餅，一份就係嚟自元朗有機農場嘅有機瓜菜。佢話呢個客已經連續三年自製月餅，自家製月餅真係要成副心機去做。呢個客咁有心，都可算係佢嘅超級fans，而佢講笑話呢排市況難搵錢，都咁有心做月餅好難得。
講番個市，近期chok上chok落，輪證市場雖然成交多咗，但要賺錢唔係咁易。于正人亦坦言，個市反彈吓又會跌番，反覆橫行。
