政壇：「膠樽」難遮黑影

立法會保安事務委員會尋日召開第二次特別會議，繼續討論國務院副總理李克強訪港期間嘅警方保安安排，禿鷹一哥曾偉雄再次到立法會解畫，但佢上次發表嘅「黑影論」同「卡住了」引起全城嘲諷，更有記者團體發起黑衣行動以示不滿。政府可能唔想立法會內火頭四起加上「黑影」幢幢成為焦點，臨急臨忙叫勞工及福利局局長張建宗出嚟，講吓「鼓勵就業交通津貼計劃」嘅進展，明顯就係借「膠樽」嚟掩蓋黑影。

勞工界促交代交津計劃

點解咁講？事關勞工界批評政府一直未有交代新交津計劃詳情，連攞申請表格睇吓張建宗都唔肯，佢上個禮拜三見完立法會人力事務委員會正、副主席李卓人同李鳳英，話最快都要喺嚟緊嘅禮拜五委員會特別會議至交代，最多喺尋日出份文件畀議員睇吓咁話，遲啲再開記者會正式宣布計劃詳情。

殊不知，勞福局尋日無端端喺十二點半通知記者，話張建宗兩點十五分見記者講吓新交津進展，專登早過立法會保安事務委員會少少，大家都諗佢冇理由咁好死未去立法會就同記者講詳情，結果佢真係「係咁意」交代吓已經準備咗啲乜嘢，詳情就留番禮拜五至講，求其答咗幾條問題就急急腳走人。咁同唔講有乜分別呢？

張建宗仲同記者講話份文件已經交咗畀立法會，但立法會就一直未上網，連議員都未收到，打聽之下至知立法會因為中秋節提早收工，趕唔切將份文件畀議員同上網，搞到鬼咁「呢hea」。老實講，睇吓尋日立法會嘅火爆情況，就知道「膠樽」吸唔到黑影啦，政府今次算盤打唔響之餘，反而仲搞衰個交津計劃添！