空有影后無支援 創意產業徒發夢

好嘢！「桃姐」葉德嫻威尼斯影展封后，摘下最佳女主角桂冠，今次仲係香港人首度獲此殊榮，認真可喜可賀！

香港演員揚威國際舞台，太一叮實在難掩興奮之情，點解呢？原因有兩個。

第一，香港演員憑精湛演技奪魁，再次印證香港電影工作者嘅努力獲得國際認同，自然好值得香港人引以為傲。

第二，講起上嚟就傷心咯，由於港府任得業界自生自滅，香港電影業近年發展停滯不前，依家難得有好消息沖喜，係咪要特別、寧舍、格外珍惜先？

嗱，港府對電影業支援不足，唔止太一叮咁講o架，唔信嘅話，聽吓業界點講吖。資深導演吳思遠批評，港府無錯係搞咗個發展基金呀，但振興電影事業唔係只靠泵水資助開戲就可以o架嘛，一定要有全套政策支持至得！

吳導演就講得啱嘞，大家不妨將時間膠卷稍稍回帶，回歸後港府有冇推出過一套全面嘅電影發展政策？答案係：冇嘅。港府大鑼大鼓話發展六大產業，電影作為文化創意產業嘅中流砥柱，曾蔭權有乜鴻圖大計呀？答案：又係冇嘅！港府支援電影業？做戲就得！

講到做戲，港府幾年前的確做咗一場大龍鳳，又成立電影發展基金，又搞電影發展局，又設立「創意香港辦公室」，港產官僚七情上面話要支持電影業，夠資格做影帝o架。不過可惜吖，假戲始終不能真做，全部措施最終雷大雨小，毀多於譽。

舉例講，電影發展基金申請關卡重重，四年嚟只係資助過十幾部戲，如果業界靠佢開飯，餓死都未天光。至於電影發展局同「創意辦」，更加好似表演默劇咁，咁多年嚟無聲無息，市民都唔知佢哋做過啲乜。

唉，八十年代香港電影曾經風靡全球，擁有「東方荷里活」美譽，但係依家凋零蕭瑟，發展停滯不前。有人話，香港電影光輝不再，致命死因係香港人嘅娛樂消費習慣改變，但太一叮認為，真正元兇係港產官僚低Ｂ就真。今次港人揚威威尼斯，反映香港擁有出色電影工作者，問題出在港府捉到鹿唔識脫角，搞到電影業光輝不再。

一句講晒，香港夢工場仍有可為，問題係港產官僚發完夢未啫。叮！