政壇：施榮忻開鑼拉頭馬旺爆
尋日馬季開鑼，百仁基金主席Jaime施榮忻嘅愛駒「愛拚者勝」出戰，Jaime同太太、爸爸施子清同大哥施榮怡等親友入場打氣，結果不負所望，飲頭啖湯拉頭馬。Jaime話今日會喺中環擺中秋宴，同家人慶祝。
喺馬場仲見到仁濟主席Edmond李文斌，佢專程嚟撐老友場。佳節當前，佢會同爸媽食飯賞月，Edmond家有喜事，二哥李文恩十月結婚，呢排全家出動籌備婚事，喜氣洋洋。同場仲有唔少父子兵，馬會大董周永健就同阿仔齊敲銅鑼，表現鬼馬。
施家總動員出動拉頭馬，左起:施榮怡、施栢鴻、施榮忻、施榮忻太太、友人、施老太同施子清。
