政壇：搞搞政：袁彌明傳婚訊棄戰
區議會選舉即將接受提名，多個政黨都空群而出，除咗啲政治明星同政壇新星外，今次仲有幾個嚟自演藝界嘅「星」落場參選，嚟一場「星」戰，點知未起戰旗，其中一個就冚旗嘞！
早前坊間盛傳選民力量成員、前港姐Erica袁彌明會喺黃埔狙擊身兼立法會議員嘅「鼠王芬」梁美芬同埋白鴿黨新星嘅黃碧雲，後來又傳Erica轉落中西區，挑戰白鴿黨嘅立法會議員甘乃威，大家當然翹首以待呢場夢幻大戰，點知選民力量主席林雨陽尋日就話，Erica嚟緊唔會落場參選，反而會轉任選民力量選舉統籌，去幫其他成員助選喎！
吓！前線變後勤？林雨陽強調Erica呢個決定完全出於私人理由。乜嘢私人理由？佢就話唔方便講喇。不過，尋日所見，Erica左手戴咗隻疑似婚戒，追問時，佢就露出甜絲絲笑容，答案盡在不言中。
