政壇：靚女AO拍片誘新血
尋日政府又再搵兩位靚仔靚女政務主任（AO），拍短片親身講述政務主任工作有幾刺激好玩，為今個月招聘AO做宣傳。AO向來被視為筍工，點解咁硬銷？日前政府空降AO做廣播處長，搞到怨聲載道，唔通政府驚嚇怕啲社會新鮮人，減低佢哋嘅投考意欲？但係有關段片嘅作用有幾大就唔知嘞！
政府新聞處尋日播出兩個AO嘅片段，其中樣貌標致嘅發展局助理秘書長李麗筠就話，做AO唔使轉工都可以經常嘗試到新嘅工作，感覺刺激，又有滿足感，仲可以拓闊眼界咁話。
世上冇免費午餐嘅，好似兩個AO話齋，份工要有分析能力同責任感，留意時事之餘亦要有好好嘅語文能力。佢哋仲話見工時係唔使背誦標準答案嘅。不過睇番依家啲高官司長，成日都畀人鬧英文唔好，又淨係識做人肉錄音機，似乎叫佢哋考番做AO，佢哋都未必考得到。
