政壇：白鴿新星唔撼嫻姐
工聯會「票后」陳婉嫻日前落區同街坊打招呼，睇嚟重披戰衣參選區議會攞立法會超級區議會入場券都呼之欲出，而原本話要狙擊嫻姐嘅白鴿黨新星李耀基就話放棄狙擊行動。
點解縮沙？李耀基話白鴿黨以往喺觀塘區主要服務公屋居民，但呢個區嚟緊會重建，興建好多私人樓，佢哋需要新血去開拓呢邊服務，所以唔想貿然離開喎。白鴿黨主席「鐵頭仁」何俊仁亦話，對於係唔係派人挑戰建制派大佬亦係未知之數，該黨今年會派一百三十人出選，四十歲以下佔差唔多一半。
鐵頭仁仲話預算動用選舉經費喺一百萬元之內，又認為今屆選舉係歷來最凶險，所以真係要打醒精神喎。對於人民力量會派出立法會議員陳偉業狙擊佢，佢就話乜都唔驚，只係最怕支持者唔出嚟投票。
