政壇：梁耀忠唔玩工黨保招牌

由多名嚟自勞工界、前任同現任立法會議員籌組嘅新工黨，諗住喺區議會選舉完後即刻開檔，本來齊集立法會一眾勞工界政治明星，但未開張已遇挫折，有人率先表明唔玩。街工決定派出六位成員參與區議會選舉，當中五人喺老巢葵涌出戰，一人空降到天水圍，而尋日會員大會一致通過，唔會加入新工黨，而身兼立會議員嘅梁耀忠以個人身份加入新工黨嘅動議，亦被大比數否決。阿忠話街工仲處於發展階段，唔想入咗工黨後又唔做嘢，搞到兩頭唔到岸，本來諗住自己加入就算，但點知都被會員否決，結果令佢好震驚。

新工黨籌組情況近排如火如荼，四出挖人入黨，職工盟李卓人更諗住靠新工黨發圍，劍指明年嘅超級議席，估唔到依家未打仗，已經損失街工呢批戰友。

街工會員唔想貿然過戶

當初有份發起搞新工黨嘅阿忠話，明白有唔少會員都唔想加入新工黨，但估唔到連自己獨立加入都有咁多人反對。佢仲話呢個消息未講畀阿人知，擔心阿人會嬲到震。

其實，街工扎根葵涌區十幾年，一直儲落唔少支持者，如今工黨冇咗阿忠玩，實力一定削弱唔少，而街工亦唔想支旗畀工黨淹沒。知情人士就話，今次街工拒絕被吞併，死因係兩幫人傾唔掂數，因為好多會員都唔想自動過戶到新工黨，認為揸住街工支旗做嘢會方便啲，而且大部分成員喺葵涌工作多年，就算冇工黨撐腰，選舉都唔成問題，所以一動不如一靜，等日後工黨成立後再睇定啲都未遲。

阿忠拒絕參加新工黨，分分鐘有漣漪效應，因為現時仲諗緊嘅仲有社福界張國柱，阿柱話社總究竟入唔入新工黨，現時仲未有時間表，總之一切未有任何傾向。