CULTURE噏：年輕人，慳啲好！

通脹逼人，連過往被視為只顧吃喝玩樂、 毫無慳錢觀念的八、九十後青年，用錢亦變得「諗過度過」，希望慳錢之餘，又不降低生活質素。香港中文大學酒店及旅遊管理學院高級導師李兆波指出，青少年收入未如理想，迫使他們更謹慎花錢，成為「慳錢族」。

YOYO：初初出嚟做嘢時，都無特別話點去慳錢，但係近呢一、兩年，通脹真係好劇烈，衣食住行樣樣都貴咗好多，唔諗吓點慳都唔得。

李：年輕人一向畀人使錢較鬆手嘅感覺，但近年香港經濟環境較唔明朗，投入社會工作不久嘅青少年，人工同佢哋預期有出入，加上通脹，令到佢哋花錢較以往謹慎。

YOYO：我嘅慳錢方法主要有三個，第一樣係帶飯返工，平均每餐可以慳番四、五十蚊；第二樣係喺內地及外國嘅購物網站買嘢，喺呢啲網站買嘢嘅價錢，較店舖便宜得多；第三樣就係同朋友去玩嗰陣，會揀啲收費較便宜的地點，之前會貪就腳去銅鑼灣唱K，依家就未必，會先格價，揀間平嘅先去唱。

李：青年人慳唔慳到錢關鍵係佢點樣對待身邊朋友嘅目光。佢哋好易受朋輩影響，朋友食好嘢、用好嘢，就會跟風。所以，如果可以搵到理念相近嘅朋友，一齊慳錢，成功嘅機會會大好多。

YOYO：朋友嘅消費習慣，對我影響好大！剛開始慳錢時，自己都不太習慣，好似帶飯返工咁，比起就咁出街食要做多好多工夫。好在有同事同我一齊咁做，大家互相鼓勵，好快就習慣咗。開始慳錢後，生活質素同之前無乜大分別，錢使少咗，真係好值得!

李：慳錢係一個先苦後甜嘅過程，使錢要諗過度過，一開始可能會唔習慣。但可以喺自己有能力嘅時候做好預備，積穀防饑，又或者將你慳落嘅錢拎去投資，咁你將來得到嘅，肯定比你依家暫時失去嘅更加多。

李兆波：香港中文大學酒店及旅遊管理學院高級導師，三十歲時就獲得「第一桶金」，其後更撰寫《慳出你的第一桶金》一書，分享自己慳錢致富之道。