政壇：CS爭奪戰鬍鬚曾冇份

城中有關疑似特首選舉嘅消息多籮籮，政務司司長唐英年更被傳好快辭職參選，真定假未揭盅，但夕陽政府已為政務司司長（CS）一職嘅繼任人議論紛紛，由於未來有九個月捱，係懸空定係搵人頂上都問題唔少，過往CS個位大都由財政司司長頂上，今次港府揀來揀去，都係提議教育局局長孫明揚、發展局局長林鄭月娥、甚至民望極低嘅政制及內地事務局局長林瑞麟（林D9）等，財爺鬍鬚曾則完全冇人提，一副出局款。

據聞，最多人提議由孫公頂上，佢喺政府做咗四十幾年，資歷絕對夠班，可惜佢腎功能衰退，大家都擔心佢捱唔捱到餘下任期，而「好打得」嘅局長林鄭又人緣麻麻。林公公本來係大熱，但係替補機制搞到民望插水。講來講去，始終冇人提過搵鬍鬚曾做CS。其實，佢做財爺以來冇乜建樹，今年搞咗個被喻為「史上最廢」嘅財政預算案，上位人選咪冇人諗佢囉。