政壇：羅棣萱區選主打安老
區選湧現好多政壇新人類，正積極考慮喺沙田馬鞍山利安選區參選嘅沙田婦女會利安服務中心主任羅棣萱（Ada）就準備行長者路線，一直關注獨居長者權益嘅Ada話，選擇重點關注長者，係因為一件令佢感受至深嘅事件。
話說有一次有位獨居婆婆喺屋企唔舒服，指明要見到Ada先至肯入院治療，直情當正Ada係佢親生女咁，此事令Ada留下好深刻嘅感覺。Ada事後話，獨居婆婆嘅信任令佢深深體會到，雖然地區工作係全天候二十四小時，但只要幫到人就一啲倦意都冇喎。Ada除咗係註冊社工外，仲係新界青年聯會委員，佢做事一向秉持「細心聆聽，用眼看，用腦想，嘴巴講」嘅精神，成為各方溝通並解決問題嘅橋樑，佢承諾今後都會繼續以同樣精神服務地區。
羅棣萱話地區工作係二十四小時無間斷，但幫到人就一啲倦意都冇。