政壇：中秋星級鮑參宴鄧細安圓長者夢
農圃飯店係米芝蓮星級食肆，亦係城中嘅名人飯堂，中秋就到，老闆鄧細安就同博愛醫院搞咗個圓夢計劃，令五十位住喺元朗、天水圍嘅長者可以喺呢間米芝蓮星級食肆歎番餐大餐，飯店特別炮製嘅的骰鮑參翅肚宴，讓啲長者喺中秋前夕實現食番餐好嘅夢想！
博愛醫院今年年初推出「長者夢想成真計劃」，為六十五歲以上長期病患或者獨居長者達成心願，今次出席嘅長者願望就係「想食餐好嘅」。
博愛第一副主席潘德明話，佢同鄧細安係多年老友，早前兩人傾開偈時一拍即合，由鄧細安請客，每位長者免費享用價值六百元嘅盛宴，包括鮑魚、海參、花膠及蛋白燴翅，博愛主席湯修齊又獻唱助興，大家都好開心！
鄧細安（中）掏荷包，向五十名長者獻上鮑參翅肚，有份參與嘅湯修齊（右）及潘德明都樂在心中。