政壇：搞搞政：高永文帶團歎潮州名食
著名骨科醫生高永文係潮州人，瘋狂熱愛潮州美食，似有變身潮州食家之勢。為咗訪尋正宗潮菜，高醫生八月中帶咗隊「為食兵團」去潮汕三市，同行仲有潮州商會青委會副主任胡炎松等，一行近十人，呢一行，佢哋嘅五臟廟最開心。
為食兵團真係名副其實為食，一日食足五餐，行程中試勻當地著名嘅滷水鵝肝、鵝肉、手打牛丸、彈牙魚蛋等，重點節目之一係參觀薄殼養殖場。
薄殼係潮汕招牌美食，殼身比指甲仲要薄，由於薄殼「脆弱」，只能派潛水員落水撈起，可謂粒粒皆辛苦。高醫生話，薄殼原來有好多種煮法，一碟金不換炒薄殼，足以令佢食幾碗白飯。此外，佢哋都試咗三十斤重嘅獅頭鵝。參觀完鵝場，眾人又直踩澄海嘅肉丸工場，品嘗當地馳名手打魚蛋及牛丸，高醫生狂掃數十斤牛丸，帶返香港做手信。
潮州美食當前，高永文（左二）與潮州商會青委會參事張少鵬（左一）、副主任林月萍（右二）及友人齊大快朵頤。（高永文提供）