政壇：新地同國壽錯盤無關
新鴻基金融上星期四因為系統錯誤，以致喺股票市場上出現對錯盤嘅情況，涉及二十五億股中國人壽嘅買盤，金額高達四百七十億港元。連日來，唔少傳媒同投資者都向新鴻基地產發展有限公司（股票代號：016）查詢，但原來呢次係一場誤會，新地今日喺報章刊登聲明，澄清自己同新鴻基金融其實一啲關係都冇。
睇番歷史，新地前身係新鴻基企業，喺一九六三年由三位商界猛人郭得勝、李兆基（四叔）同馮景禧合資創辦，當年有「地產界三劍客」嘅美譽，及後去到六九年底，其中一位創辦人馮景禧將大部分持有嘅新鴻基企業股份出售，自己成立一間獨立嘅公司「新鴻基證券」，亦即今次涉及國壽錯盤事件嘅新鴻基金融前身。再者，新鴻基金融早喺九六年已出售咗畀另一個家族，同新地絕對係兩間獨立公司，冇從屬關係，純粹係歷史原因先用相同嘅名。