政壇：機管局慳錢被投訴？

機管局構思興建第三條跑道，行政總裁許漢忠都紆尊降貴做推銷員，四出推介呢條新跑道嘅重要性，可惜好多疑難都無法解決。麻煩未解下，許漢忠最近卻傳喜訊，事關CEO換新座駕，許漢忠揀咗部價值七十萬嘅奧迪A6房車，可以同佢架有八年車齡嘅凌志拜拜。不過，我哋日前就收到投訴，質疑佢先斬後奏買車，管治混亂且肥上瘦下等，機管局雖作出澄清，但跑道風波未解下，許漢忠又惹換車風波，內部怨氣似乎不容忽視！

自己友質疑肥上瘦下

有關投訴話，許漢忠買車事件涉有人罔顧採購程序，擅自作主買咗新車後，貨到先搵手下去補飛，仲以「上下齊心、瞞天過海」來形容，投訴人仲斥責局內存在「許氏王朝」等。機管局公關話，局方一直以嚟都有為CEO及總監提供車輛使用，按照內部指引，公司車輛車齡超過六年或者行駛超過十八萬公里，應該考慮換新車。

許漢忠部舊車凌志LS430已經用咗八年，行駛路程超過二十六萬公里，中間又大修過好多次，繼續再整唔多划算，所以喺得到主席批准後決定換新車，成個採購程序完全符合規定。至於新車，許漢忠揀咗部奧迪（Audi）A6 3.0 TFSI quattro四門房車。佢哋強調，CEO買車金額並無上限，但為慳錢緣故，許漢忠揀咗部2010年款，車價只約七十萬，仲平過舊嗰部嘅七十三萬。

雖然機管局解畫令許漢忠換車嘅疑慮減低咗，但係投訴人提及嘅情況卻不容忽視，無論係所謂嘅「許氏王朝」、定係肥上瘦下指控，投訴都係局內人居多。家吓政府同機管局都為咗第三條跑道打緊仗，作為最大推銷員嘅許漢忠如果出現跛腳徵狀，肯定會影響大局，坐擁新車嘅許總裁真係要打醒十二分精神至得喇。