政壇：搞搞政：李泳漢出戰星閃區選
嚟緊嘅區議會選舉除咗政星之外，仲有好多演藝界嘅「星」加入戰圈。
繼前港姐袁彌明、「慢咇」陳志全後，依家又多一個，就係前港姐楊思琦前度男友李泳豪嘅孖生大哥李泳漢，原來佢平時都好留意時事，近日仲決定拍住人民力量參選十一月區議會選舉添！
李泳漢尋日解釋，以前喺大學修讀政治學，所以並唔係突然間對政治有興趣，之前一直冇行出嚟參加政治活動，全因為想集中精力去發展事業，今次如果唔係有啲立法會議員發表一啲極度反智嘅「懲罰選民論」，佢都唔會下定決心參選。
失驚無神話選區議會，當事人都直言家人起初好愕然，仲唔多支持，最終都畀個仔感動到。李泳漢正積極考慮喺九龍城區議會黃埔西選區出選，挑戰現任西九新動力議員，雖然起步遲咗啲，但相信選民會見到佢都係真心為香港好，得票唔會太難睇喎。
