政壇：白鴿難攞特首入場券
各疑似特首候選人都已進入作戰狀態，泛民主派固然想分一杯羹，白鴿黨更加流晒口水。不過，今屆特首選舉已提高門檻，參選人須湊夠一百五十個選委提名，唔同上屆咁話選就選。據聞，泛民對參選唔係太樂觀，白鴿黨更不停呼籲專業界別參選，但目前只係搵到一百二十人出戰選委會，就算贏晒都仲欠三十個提名，連入場券都攞唔到。
正當白鴿黨苦惱緊選委戰之際，佢哋喺區議會戰場已經火燒後欄。人民力量黃毓民話將派出六十一人參選，差唔多有一半人係挑戰「偽民主派」，例如陳偉業就會去屯門向何俊仁「挑機」。
毓民多次強調，人民力量今次參選不計議席，目標志在擊敗對方幾個大佬級人馬，睇嚟白鴿黨今次唔死都一身潺。