熱帶語林：揸胸撐特首

地府陰曹，鬼影幢幢，陰森可怖。忽然之間一團黑影掠過，地獄使者心生疑竇，莫非可惡的記者勇闖鬼門關，企圖揭發十八層地獄的種種黑幕？本欲基於本能反應伸手擋格，一定神，沒事沒事，黑影的主人原來是閻羅王本尊，鬼王之王趕着升堂嚴審鹹濕鬼罷了。

閻羅王：「鹹濕鬼報上名來！」

鹹濕鬼：「來到地獄之後，老竇姓乜都唔記得，只記得陰差鬼使叫我做『摸奶男』。」

閻羅王：「摸奶男，你如何死法？」

鹹濕鬼：「哦，是咁的，我當日行街見到一位低胸裝性感靚女，忍唔住伸手摸佢波波。然之後，聽到有人尖聲呼叫：『咁多人死唔見你死，仆街啦！』於是乎，我果然應聲倒地仆於街頭，死了。」

閻羅王：「斗膽賤男，當街當巷非禮民女，該當何罪？我判你落油鑊之前，想先煎皮還是拆骨？」

鹹濕鬼：「冤枉啊大老爺！小人並非存心非禮，我只不過一心一意支持曾蔭權政府。你知啦，我身為愛國愛港良好市民，眼見特區政府曾氏四人幫民望跌到一仆一碌，於心實在難忍。當我見到俄羅斯出現一位奇男子，我靈機一觸，揸胸撐特首！」

閻羅王：「俄羅斯乜鬼奇男子？」

鹹濕鬼：「是咁的，俄羅斯一位仁兄叫做Sam Nickel，成功游說一千名女子任得佢揸胸，而且擺明車馬鏡頭之前施展祿山之爪，再以揸盡一千對酥胸之手同總理普京握手，以示將粉絲支持偶像之『胸氣』過戶。就係咁，我有樣學樣，揸胸撐特首，唔使曾蔭權民望掃地吖嘛，誰不知只完成千分之一目標已出師未捷身先死。」

閻羅王：「原來係咁，抵你仆街啦。好撐唔撐，撐一個視民望如浮雲嘅政壇神獸小學雞？鬼卒聽令，掟佢落油鑊！」