政壇：泛民自摑撐委任區議員

一直係建制派天下嘅東區區議會，主席丁毓珠已連續三屆獲政府委任，下屆好大機會由副主席、建仔鍾樹根坐正。據聞，會內處於弱勢嘅泛民主派，擔心日後嘅聲音會被打壓，連帶申請撥款都未必咁順利，到時就會更加被邊緣化，所以最近有傳聞佢哋罕有發短訊挽留珠姐，避免主席之位落入建仔手中。

不過，泛民一向聲嘶力竭反對區議會委任制，更曾經多次狠批夕陽政府遲遲未公布取消區會委任制嘅細節，如果今次泛民為咗唔想主席之位落入建仔手中，反而去撐一個委任議員做主席，確係自打嘴巴。

尋日係東區區議會喺換屆前最後一次會議，亦係珠姐最後一次主持大局。臨別依依，佢話同四十幾個區議員一齊解決咗好多地區民生問題，覺得好開心，好有滿足感，所以要離開都好唔捨得，佢仲帶咗啲茶葉嚟送畀一班好同事，而佢以後會多啲時間陪屋企人，享受吓人生。