政壇：新民黨傑青區選戰天頌
區議會選舉在即，但新民黨未出師就先臨陣易將，原本安排參選元朗區議會天頌區嘅消防處職工總會前主席崔志強，因為彈弓手（手指屈肌腱鞘炎）、脊骨神經等舊患逐步浮現，最後決定改為擔任義工，取而代之嘅係另一黨員Legward黃卓健上陣。
年僅二十八歲嘅Legward係舊年十大傑出青年，又一手創立長者家慈善基金。佢話原本有機會喺區議會選舉前數日修讀哈佛課程，全球只有二、三百人獲得取錄，其中全亞洲獲取錄嘅比率更只有百分之三，但佢衡量後為咗情義同有心服務居民，決定積極考慮參選，希望日後可以提出建議，改變下一代喎。至於該黨副主席田北辰亦正積極考慮喺荃灣愉景新城參選。據聞該黨內部擔心，一旦田二少喺區選敗北，可能會對明年立會選舉有影響，所以最終佢何去何從，大家就拭目以待喇！
（設計圖片）