政壇：渣打崔晸圭 早餐冧同事
嚟自韓國嘅渣打中國個人銀行總裁崔晸圭（Jungkiu）到上海履新已十個星期，不諳普通話但識寫一千八百個中文字嘅佢，為咗盡快與同事打成一片，先為分行同事準備早餐，再而開個人微博，拉近與同事之間嘅距離。
至今佢已向分行同事派咗十七次早餐同四次下午茶，佢希望喺明年六月之前能夠巡視所有網點一次，依家渣打喺內地網點共有七十二個。受寵若驚嘅同事亦好識做，送咗個迷你Jungkiu畀佢，仲話Jungkiu係劉備添！
講起語文，唔知大家識唔識讀Jungkiu個中文名「晸圭」呢？根據中大嘅粵語審音配詞字庫，「晸」粵音為「整」，至於「圭」粵音為「歸」。
韓國人鍾意食辣，佢嚟到中國就鍾意食同樣夠辣嘅四川火鍋。內地人愛好嘅杯中物亦難唔到佢，佢話飲到五十六度嘅水井坊呢。
崔晸圭（中）履新十個星期內，已向分行同事派咗十七次早餐同四次下午茶。