政壇：勞處鬼祟考察標準工時
煲呔曾去年喺施政報告大大聲話開綠燈研究標準工時，事隔一年，就嚟執包袱嘅似乎流於大隻講，勞福局局長張建宗喺七月中，靜雞雞派咗個勞工處助理處長去歐洲考察當地嘅標準工時實施情況，不過，呢個動作可能只係畀煲呔曾喺下月發表施政報告時敷衍市民之用。
呢個歐洲考察標準工時之旅，莫講話勞工界蒙在鼓裏，就連立法會議員都話無聽過。據聞，暑假期間有人見到勞工處助理處長陳圳德一行人搭飛機去布魯塞爾，打聽之下，先至知道原來係勞工處派人去咗布魯塞爾同倫敦，先去布魯塞爾歐盟總部了解吓歐盟推行標準工時嘅工作，隨後再去倫敦考察。不過，勞工處到依家都未有交代過，只係話標準工時仲係研究階段喎。勞工界人士話，睇怕勞工處同立法會七月兩趟海外考察，都係嘥錢居多喇！