政壇：搞搞政：林煥光悔入官場唔教書

回望過去，唔少人都會對過去嘅選擇有另一番睇法，喺官場打滾三十幾年、最終因婚外情而辭職嘅林煥光，轉任平機會主席後，雖然搵到另一個出發點，但佢尋日喺電台節目中自爆，如果當年去教書可能好過做官。

點解林煥光覺得做阿sir更適合佢呢？佢話自己一向唔係好識講嘢，做官嘅時候，最辛苦就係應付一眾傳媒。但係，近呢幾年佢去大學教書講道理，就搵到最大滿足感；自言讀書係興趣嘅林煥光仲話，佢已經愛上咗教書，每次備課時，都覺得好興奮、好好玩，因為可以從自己已知嘅知識中抽取精華嚟教授，絕對有種溫故知新嘅感覺。

講到官場歲月，佢就話喺政府嘅第一份工係喺當時嘅新界理民府處理清拆寮屋問題，佢話當年村民被拆屋都好激動，但只要企喺佢哋嗰邊諗，就會理解佢哋點解咁嬲。佢話做官唔一定要搞到黑白、敵我分明，有時要畀市民有好處，先係化解官民矛盾嘅最好方法。不過，佢嘅領悟似乎家吓好多高官都唔識噃。