政壇：新地捐320萬助中山貧生
新地郭氏家族嘅新鴻基地產郭氏基金（新地郭氏基金）近日喺家鄉中山市再有個項目，並由郭氏基金執行董事郭婉儀與中山市有關部門簽署推行第二期「新鴻基地產郭氏基金‧中山市扶困助學金」，今次佢哋再提供一項為期七年嘅捐助，捐助一百六十萬人民幣畀貧困學生完成大學課程，兩期計劃共捐三百二十萬人民幣。
呢項資助亦係郭氏基金喺內地唯一設於地級市教育局專設嘅助學金項目，郭婉儀話，好高興能為家鄉嘅貧困學生提升升讀大學嘅機會，以貫徹郭氏基金「育人樹人，科教興國」嘅宗旨。唔講唔知，郭氏基金○二年成立之後，喺內地多所名牌大學都設有助學金，包括清華大學、浙江大學、上海交通大學、復旦大學等，已經資助咗五千多個清貧學生。
郭婉儀（前排左）同中山市人民政府副市長唐穎（前排右）喺雙方負責人嘅見證下，進行捐贈簽署儀式。