政壇：女議員復會鬥造假

為咗面子工程，政府高官高壓追趕添馬艦新政府總部嘅後期工程，結果被踢爆多單衰收尾事件，唔係燒焊唔妥、室內水長滲，就係硬件軟件問題多多，入去做開荒牛嘅公務員苦不堪言，下一個受害者可能係立法會。為免到時甩轆出醜，立法會決定搞「綵排」會議，仲邀請啲議員熱心出席添，據講，公然參加「造假」嘅有富貴黨主席劉健儀、白鴿黨嘅劉慧卿及建仔嘅李慧琼，因為佢哋到時會提「質詢」、「動議」，至於卿姐會唔會加演離場抗議、長毛會唔會試吓掟嘢就唔知喇！

試開會流程驗投票器

立法會將於十月初復會，日前秘書處已經開始搬竇，放完暑假後，新立法年度嘅會議都喺添馬艦開，但新議會大廳嘅設施得唔得卻冇人知，所以立法會決定綵排吓，如決定十月第一個禮拜二正式假復會，仲決定一日內開足幾個會，包括大會、法案委員會、財委會，連人事編制同工務小組委員會都要逼埋同一日開會。

極速開快車，係因為秘書處要測試各個開會流程，起碼畀啲議員測試吓投票器、發言咪甚至秘書處喺新辦公大樓嘅後勤支持等，每個環節都不容出事，如果唔係，正式大會時投票出蝦碌，就真係醜死人兼影響議會運作啦。

今次測試嘅模擬會議跟足程序，大會喺朝早十一點開始，有兩條質詢，之後到議員議案。下晝兩點半就試吓財委會同內會，傾吓沙中線撥款同政務司司長會面事宜，內容似層層。不過，造假都有漏洞嘅，事關佢哋乜都試勻，但就冇打算測試保安企位，似乎佢哋預咗呢個造假大會唔會有衝突發生。