政壇：搞搞政：肥亨撐師弟妹示威

港大8．18事件發生後，引起好多港大校友關注，港大舊生、做過商務及經濟發展局局長嘅中策集團主席馬時亨話，見到母校慶祝百周年校慶時發生令好多人唔開心嘅事，感到好可惜，仲認為係溝通嘅問題，仲話就算畀國家領導人見到示威，都唔係一件失面子嘅事。走出官場後肥亨一直言行灑脫，今次再次毫無保留咁捍衞師弟妹，算唔算暗摑警方嘅安排一巴呢？

肥亨尋日出席一個活動時話，自己以前做局長時都接過唔少示威者嘅請願信，就算今次畀國家領導人見到有人示威，都冇大問題。佢仲話，作為港大校友，佢都想母校形象好啲，學生開開心心，而且，香港一向都多示威，呢個係香港嘅文化，一個城市有一個城市嘅規矩，示威都係一種表達方式。

佢嘅囡囡年底就會出嫁，講起呢件喜事，肥亨開心到笑騎騎，佢話囡囡同未來女婿之所以揀Boxing Day結婚，因為未來女婿喺嗰幾日生日，諗住結婚同生日一齊慶祝，好事成雙喎！