政壇：港府鬼祟激嬲台傳媒

香港傳媒批評政府同相關機構處理採訪安排問題多多，最新事例就係出醜到台灣。旅遊發展局台北辦事處尋日正式升格為分公司，港府派出商務及經濟發展局長蘇錦樑、旅遊事務專員容偉雄同香港旅遊發展局主席田北俊一齊主持開幕禮。原本係件開心喜事，但儀式竟然閉門舉行，唔開放畀記者採訪，職員推搪嘅藉口百變，最終激怒當地傳媒，認真失禮人。

講起呢單鬼祟嘅開幕儀式，旅發局嘅處理方法好令人費解，面對記者詢問，解釋更加反覆不一。初初辦事處人員拒接電話，後來接電話後，聲稱因為蘇錦樑係高官，所以不便邀請傳媒。後來又改稱，因蘇錦樑行程緊湊，冇時間接受採訪。眾記者群起抗議後，職員改稱可影相，但唔可以訪問。

台灣傳媒怒不可遏，事件愈鬧愈大，最後田少解畫話，因為場地太細，恐怕大批記者到場會令秩序失控，所以至有咁嘅安排。淨係開幕儀式點解唔公開，都搞到七國咁亂，真係丟晒香港嘅架！