政壇：門常開慘淪通訊孤島
添馬艦新政府總部日夜趕工，雖然裙拉褲甩下勉強趕到大致完工，但似乎只得表面過得去，內裏卻令人頭擰擰，繼早前發現有滲水外，呢幾日陸續入伙嘅政策局中人亦發現，新政總範圍內嘅手提電話訊號極之微弱，唔少人嘅手機都只收得一格，位於中區心臟地帶嘅門常開竟然變咗通訊孤島，真係笑死人！
有近日搬入新政總嘅政府中人爆料，話喺嗰度用手提電話好唔容易，事關多個電話網絡供應商嘅訊號都收得麻麻哋，據講有某個供應商嘅訊號更加奇差，長期只收到一格訊號。據聞，多個電話網絡供應商收到投訴後都知衰，即時諗吓有乜嘢辦法補鑊，包括立即派人到新政總加快鋪設發射同接收訊號裝置。
新政總嘅電話網絡訊號搞到一鑊泡，睇怕毗鄰嘅新立法會大樓亦唔會好得去邊，如果政府家吓有重要條例需要搵議員撐，班政府狗仔隊會唔會揸住電話喊呢？