政壇：梁高美懿同長者做節
中秋節將至，恒生副董事長兼行政總裁梁高美懿已提早出動，早前同二百個長者先行慶中秋，班長者都好有心，特登練定龍船舞，仲改編埋山歌嚟表演，梁太眼見啲長者跳得咁過癮，都好似啲表演者咁持槳影張相開心吓。
梁太好大手筆，揀咗特製恒生健康月餅送畀班老友記，仲預備咗啲有意頭嘅佳餚畀長者歎添。據介紹，為咗今次活動，恒生特登派咗50個恒生義工接受特訓，苦練侍菜技巧，而當日嘅菜式更經特別設計，包括有「珍珠耀滿堂」（松茸珍珠貝燉花膠）、「龍馬倍精神」（大良牛乳炒蝦球）、「萬事皆如意」（陳皮雲耳蒸鱈魚件）等，睇到都令人想流口水！
