政壇:長毛篤肥佬黎有因由?

白鴿黨議員甘乃威(甘威)喺○九年被踢爆涉嫌求愛不遂怒炒女助理嘅醜聞,《蘋果日報》非但冇護短為甘威淡化是次醜聞,反而一連三日就此大做文章,而且火力強勁。根據立法會議員「長毛」梁國雄嘅理解,呢個做法原來另有內情。

維基解密日前揭露,長毛曾經向美國駐港總領事館爆料,話《蘋果日報》肥佬黎係北京嘅盟友,所以大做甘威其實係北京嘅「柯打」,台灣《蘋果日報》直情係北京嘅傳聲筒添!《蘋果日報》尋日否認有關講法,但長毛都係泛民中人,所爆嘅料都唔可以話完全唔可信。

話時話,北京對於唔聽話嘅人反而會加以獎勵,好似前幾日訪華作國事訪問嘅菲律賓總統阿基諾三世,北京既以高規格接待,又避談南海爭議,亦冇要求阿基諾三世就人質事件道歉,最後仲同菲方簽署經貿、旅遊等高達五百幾億港元嘅合作協議。如果按照番呢個邏輯推論,長毛今次爆料話肥佬黎係北京傳聲筒,都未必無因。

「Money18免費即秒股票報價網站」現推出8升級功能,財經資訊,實時實發!