政壇：公文袋白鴿黨 政團排名大插水

新一屆區議會選舉投票日不足兩個月便殺到，尋日選舉管理委員會高調宣布連串安排時，香港大學公布嘅最新政黨政團民調亦顯示，泛民兩大黨公文袋同白鴿黨都有得震冇得瞓，事關兩黨評分都拾級而下，喺十大中排近榜尾，兩黨黨魁袋巾傑同鐵頭仁喺大戰前夕竟然攬住插水，容乜易跌到渣都冇o架！

香港大學民意研究計劃上月透過真實訪員以隨機抽樣方式調查十大政治團體排名，並由被訪者給予評分，對比三個月前，十個政團中有七個嘅評分都下跌，跌幅最大嘅前三名係公文袋、支聯會同白鴿黨，分別下跌三點一、二點九及二點四分，得分分別為四十六、四十八點八和四十五點三分。據分析，公文袋插水，可能同外傭居港權官司有關；至於白鴿黨就可能同該黨前總幹事陳家偉涉嫌嫖妓有關。

工會勢力贏晒

十大政團中，工會勢力贏晒，工聯會、職工盟同街工得分超過五十分，兩大工會分別排第一同第二。各大政黨中，唯一飲得杯落嘅可能係新民黨主席葉劉淑儀，因為佢哋嘅評分較三個月前上升三點三分。至於靠激出位嘅社民連同人民力量，雖然近期有唔少動作，但從最新民調嚟睇，社民連排第十位，人民力量卻因認知度不足，連十大都唔入，而且評分亦下跌，真係要疊埋心水反省吓。

區議會選舉月中開始提名，泛民兩大黨呢個時候民望插水，真係唔可以輕視，隨着選戰逼近，政治攻防亦拉開序幕，到時導致佢哋民望插水嘅外傭官司、嫖妓疑竇等都可能再畀對手狙擊，袋巾傑、鐵頭仁除咗嗌救命外，仲有乜招數呢？