政壇：搞搞政：擦「克勤」鞋 邱騰華無聊

邱騰華上場做咗環境局局長幾年，推動環保工作不力，好似慳電膽風波無限期擱置；空氣質素指標○九年施政報告提出要檢討，至今都未推出新嘅指標，即使之前成功推動停車熄匙政策，但都慘被「剝光豬」先獲得通過。

邱局長尋日應邀出席立法會議員陳克勤喺沙田開設嘅第九個議員辦事處時，提及環保工作嘅進展小，反而花時間做資料搜集大讚克勤，發言時指「克勤」呢兩個字嘅出處，係源自五、六千年前大禹治水，然後大讚克勤進入議會中工作好投入。

老實講，克勤得到邱局長嘅謬讚當然好受落，但一直關注環保工作嘅團體就唔係咁諗喇，因為佢哋望穿秋水好多嘅環保政策措施，一係一拖再拖，一係就石沉大海，長遠下去本港整體競爭力只會進一步削減，因此，邱局長與其有時間做埋啲咁無聊嘅嘢，查典籍捧到其他人上天，不如將所屬政策範疇重新審視一次，咁先符合廣大市民嘅共同利益。