政壇：林健鋒囝囝打理家族生意

立法會議員林健鋒（Jeffery）好幸福，因為佢爸爸係有「變形金剛之父」稱號嘅永和實業創辦人林亮，所以Jeffery自細就喺玩具堆中長大，但係佢就透露唔少玩具業經營秘辛。原來做呢行最緊要接有電影配合一齊出嘅定單嚟做，而且角色要夠多，例如高達、變形金剛同星球大戰等，故事入面嘅角色多、武器多，自然長做長有。

Jeffery近年全情投入公職，愈嚟愈唔得閒打理家族生意，好彩囝囝林凱章已返公司幫手，祖孫三代仲經常現身公開場合。

林伯係玩具業嘅老前輩，佢最津津樂道嘅一段輝煌歷史，就係靠一隻黃色塑膠鴨仔打敗日本仔。原來佢經歷日本侵華嘅切膚之痛，好痛恨日本人。六十幾年前，當時玩具十之八九係日製，林伯建議當時嘅永新塑膠廠，以新材料聚氯苯烯壓製鴨仔，取代日本以易燃塑料「賽璐珞」製造嘅鴨仔，結果呢一仗打沉日本仔，從此開啟香港塑膠玩具嘅新時代。